“Xaricdə kifayət qədər tanınmış alimlərimiz var. Eyni zamanda elmi pedoqoji və elmi fəaliyyətlə məşğul olan yeni nəsil alimlərimiz də yetişməkdədir".
Bu sözləri Diaspora.TV-yə açıqlamasında təhsil üzrə ekspert Elşən Qafarov deyib.
Ölkə prezidentinin müvafiq sərəncamı ilə bir neçə ildir xaricdə təhsil üzrə dövlət proqramları həyata keçirilir:
“Birinci proqramdan fərqli olaraq, ikinci proqramda “magistratura” və “doktorantura” üzrə təhsil almaq üçün göndərilənlərin sayı üstünlük təşkil edib. Buna səbəb hazırda ali məktəblərimizdə elmi-pedoqoji və elmi kadrların çatışmazlığıdır. Onların təhsil aldıqdan sonra Vətənə qayıdıb işləmələri üçün müvafiq şəraitdə yaradılıb”.
E.Qafarov vurğulayıb ki, Dövlət Proqramından yararlanan hər bir şəxs ölkəyə qayıtdıqdan sonra işlə təmin olunması ilə bağlı zəmanət alır:
“Xaricdə fəaliyyət göstərən alimlərimizin ali məktəblərimizə dəvət olunması çox təqdirəlayiq hadisə olardı”.
Ekspert qeyd edib ki, ali məktəblərimizin büdcəsi və verdiyi əmək haqqı, o qədər kiçikdir ki, alimlərimizin aldığı əmək haqqı onların yol puluna belə çatmaz:
“Onlar yaşadığı ölkələrdə və elmi cəmiyyətlərdə azərbaycanlı olaraq fəaliyyət göstərir və dövlətimizi həmin ölkələrdə təmsil edirlər”.
E.Qafarov bildirib ki, xaricidə yaşayan alimlərimizin KİV-lərdə tanıdılması çox müsbət addım olardı.
Həsən Hüseynov
Diaspora.TV
