Bakıda Ukrayna Milli Kinematoqrafçılar İttifaqı ilə Azərbaycan Kinematoqrafçılar İttifaqı arasında Tərəfdaşlıq və Əməkdaşlıq Memorandumu imzalanıb.
Diaspora.TV xəbər verir ki, bu mühüm hadisə “Ukrayna mədəniyyətinin yeni üfüqləri” Ukrayna Kino Günləri çərçivəsində baş tutub. Sənəd səmərəli qarşılıqlı əlaqə və təcrübə mübadiləsi yolu ilə hər iki ölkənin kinematoqrafiya sənayesini inkişaf etdirmək niyyətlərini müəyyən edir.
Əməkdaşlığın əsas istiqamətləri:
- birgə tədbirlərin təşkili;
- təhsil proqramlarının yaradılması;
- film istehsalı təşəbbüslərinin dəstəklənməsi;
- beynəlxalq layihələrin həyata keçirilməsi;
- qrant müraciətlərinin hazırlanması və təcrübə mübadiləsi kimi məsələləri özündə ehtiva edir.
Tərəflər əməkdaşlığın şəffaflığını təmin etmək, tərəfdaşlıq münasibətlərini dəstəkləmək və tərəflərdən birinin nüfuzuna xələl gətirə biləcək hərəkətlərdən çəkinmək barədə razılığa gəliblər.
Memorandumu rəsmi olaraq Ukrayna və Azərbaycan Milli Kinematoqrafçılar İttifaqının rəhbərləri Serhii Bordenyuk və Rasim Balayev imzalayıblar. Bu müqavilə mədəni dialoqun və beynəlxalq əməkdaşlığın mühüm elementi kimi kino sənətini inkişaf etdirmək üçün iki ölkənin birgə istəyinin rəmzidir.
