“Səməndər Sosial Araşdırmalar və İnformasiya Mərkəzi” İctimai Birliyinin Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirdiyi “Türkiyədə çoxpartiyalı sistemin formalaşmasında iştirak etmiş azərbaycanəsilli siyasətçilər” adlı layihəsi çərçivəsində araşdırmalar davam edir.
İB-dən Diaspora.TV-yə verilən məlumata görə, layihə rəhbəri Cəmaləddin Quliyev bu məqsədlə Türkiyə Respublikasının paytaxtı Ankara şəhərinə ezam edilib. Ezamiyyə müddətində İctimai Birliyin Türkiyə nümayəndəsi, “World Panorama” Strateji Araşdırmalar Mərkəzinin sədri, politoloq Ramiyə Məmmədovanın da iştirakı ilə bir sıra görüşlər keçirilib.
Türkiyəli siyasət araşdırmaçısı, Azərbaycanda milli dövlət yaranması mövzusunda elmi iş müəllifi, azərbaycanəsilli ictimai-siyasi fəal Mehmed Qiyas Azəritürk, Azərbaycan Mədəniyyət Mərkəzinin (Kültür Dərnəyinin) sədri Cəmil Ünal, Türkiyə Abidələr (anıtlar) Cəmiyyətinin sədri Səlcuq Önal, Türkiyədə çalışan tədqiqatçı alim Mərziyə Məmmədli, Türk Yapon Dostluq Cəmiyyətinin sədri, professor Nejat Bora Sayan, TADİV koordinatoru Əliəkbər Tufan, uzun illər Azərbaycan diasporunun rəhbərlərindən olmuş Mehmet Kəngərlinin qızı, tanınmış vəkil Sevil Kəngərli, Azərbaycan mühacirətinin tədqiqatçısı Adəm Ağar və başqaları ilə görüşlərdə Türkiyə Cümhuriyyətinin quruluşunda, ilk siyasi təşkilatların, eləcə də hüquq müdafiə və qadın hüquqları təşkilatlarının yaranmasında, pantürkizm, panislamizm, siyasi liberalizm, sosializm kimi siyasi ideologiyaların yayılmasında, parlamentarizmin inkişafında xüsusi rol oynamış azərbaycanəsilli şəxslərin həyatı, onların irsi haqda söhbətlər aparılıb, yeni fakt və məlumatlar əldə edilib.
Ezamiyyə müddətində Ankara Millət Kitabxanasının bazasında mövzuya uyğun materiallar araşdırılıb, eləcə də ödənişli və ödənişsiz elektron arama alətlərinin köməyi ilə Türkiyə arxivlərində saxlanan, mövzuya uyğun müəyyən materialların bir qismi nəzərdən keçirilib.
