“Azərbaycan ədəbiyyatının, mədəniyyətinin xarici ölkələrdə təbliği güncəl mövzudur”.
Bu fikirləri Diaspora.TV-yə açıqlamasında şair Əkbər Qoşalı deyib:
“Ona görə vacibdir ki, Ermənistanın uzunmüddətli, sistemli anti-Azərbaycan təbliğatı sıfırlanmalıdır. Savaş meydanında qazandığımız tarixi zəfəri mədəniyyət müstəvisinə daşımalıyıq. Mədəniyyət savaşı yalnız zəfərsonrası aparılmır. Əlbəttə, əvvəllər də bu yöndə önəmli işlər görülüb. Müvafiq dövlət orqanları, Heydər Əliyev Fondu ən müxtəlif layihələrlə, nəşrlərlə, festival, simpozium, konfrans və digər addımlarla unudulmaz, qalıcı işlər görüb. Xüsusilə, Azərbaycan mədəniyyət mərkəzlərinin qurulması yüksək dəyərə malikdir. Məsələn, Daşkənddəki Heydər Əliyev adına Azərbaycan Mədəniyyət Mərkəzinin fəaliyyəti ilə daha yaxından tanışam. Özbəkistan bizim üçün xarici deyil, qardaş ölkədir, bununla belə, qardaş ölkələrdə də iş görmək lazımdır. Məhz həmin mərkəzin sayəsində Özbəkistanın az qala hər şəhər, hər universitet və böyük kitabxanasında Azərbaycan mədəniyyəti, ədəbiyyatı, incəsənəti, mədəniyyət xadimləri ilə bağlı guşələr, daimi ekspozisiyalar açılıb. Az qala hər il Özbəkistanın ayrı-ayrı şəhərlərində Azərbaycan Ədəbiyyatı, Mədəniyyəti Günləri keçirilib. Rusiya Federasiyasının ayrı-ayrı vilayətlərində diaspor təşkilatları vasitəsilə yaddaqalan mədəniyyət tədbirlər, layihələr reallaşdırılıb”.
Ə.Qoşalı qeyd edib ki, Azərbaycan UNESCO, İSESCO platformalarında, özəlliklə, Birinci vitse-prezident, Heydər Əliyev Fondunun prezidenti Mehriban xanım Əliyevanın tarixi təşəbbüsləri ilə önəmli işlər görüb:
“Dövlətimizin üzv olduğu digər beynəlxalq təşkilatlar, o cümlədən Qoşulmama Hərəkatı, qurucu üzv olduğumuz ortaq türk təşkilatları da mədəniyyətimizin təbliği baxımından bizə ciddi platformalar qazandırıb. Təbii, diaspor təşkilatları özünəxas imkanlara malik olduğu kimi, qayğılara da sahibdir. Mədəniyyəti qorumaq anlayışından daha çox mədəniyyətin özünün bir milli qoruma aktı olduğunu da vurğulamalıyıq. Bəzən bir əsər, bir müəllif nazirliyin işindən daha təsirli ola bilər. Məncə, bu amil diqqətdən qaçmamalıdır. Hesab edirəm ki, indiyədək görülmüş işlərə qədirşünaslıqla yanaşmaq, mövcud boşluqları, çatışmazlıqları üzə çıxarmaq və təmənna güdmədən gərəkli addımlar atmaq olar”.
Zəfər
Diaspora.TV
