“Azərbaycanın müstəqillik tarixində ilk dəfə olaraq sentyabrın 1-də Milli Məclisə növbədəkənar seçkilər ölkənin bütöv ərazisində keçiriləcək. Bu, tarixi və mühüm əhəmiyyət kəsb edən bir hadisədir”.
Diaspora.TV xəbər verir ki, bu fikirləri “Seçki 2024” Müstəqil Media Mərkəzinə açıqlamasında Ukrayna Azərbaycanlıları Birləşmiş Diasporunun sədr müavini Elşad İbrahimov deyib.
Onun sözlərinə görə, azad edilmiş ərazilərdə seçkilərin keçirilməsi Azərbaycanın bu torpaqlardakı suverenliyinin və ərazi bütövlüyünün bərpa olunduğunu bir daha təsdiqləyir.
“Torpaqlarımız işğal altında olanda ölkənin müxtəlif yerlərində məskunlaşmış vətəndaşlarımız səsvermə hüququndan istifadə edirdi. İndi isə “Böyük Qayıdış” dövlət proqramı əsasında azad olunmuş ərazilərimizə qayıdan sakinlərimiz Şuşada, Füzulidə, Zəngilanda, Laçında, Xankəndidə və başqa azad olunmuş ərazilərimizdə səsvermə hüququndan istifadə edəcəklər. Sevindirici hal odur ki, azad olunmuş ərazilərimizdən deputat seçilmək istəyən namizədlər öz təşviqat kampaniyalarını elə həmin ərazilərdə keçirirlər. Qalib, günü-gündən inkişaf edən ölkənin vətəndaşları olaraq bütün suveren ərazilərimizdə seçkilərin keçirilməsi həqiqətən də qürurvericidir”, - deyə E.İbrahimov qeyd edib.
Diaspor nümayəndəsi sentyabrın 1-də Milli Məclisə keçiriləcək seçkilərin beynəlxalq aləmdə də diqqətlə izlənildiyini vurğulayıb:
“Artıq dünyada söz sahibinə çevrilən Azərbaycanın siyasi həyatında baş verən mühüm hadisələr dünyanın hər yerində diqqəti cəlb edir. Seçkiləri xaricdə yaşayan Azərbaycan diasporu da yaxından izləyəcəklər. Çünki ilk dəfədir ki, işğaldan azad edilən torpaqlarımızda da seçkilər keçiriləcək. Bu da hər bir soydaşımız üçün qürur məsələsidir”.
