Rusiyanın “İzvestiya”, “Komsomolskaya pravda” və digər nüfuzlu nəşrləri Sovet Zaqafqaziyasında, xüsusilə də Azərbaycanda 100 il əvvəlki maarif səviyyəsinə dair məqalə dərc edib.
Diaspora.TV həmin materialı təqdim edir:
- Bakıda Azərbaycan təhsil işçilərinin qurultayı keçirilib. Xalq maarif komissarı Mustafa Zəkəriyyə oğlu Quliyev öz məruzəsində Sovet respublikasında təhsil müəssisələri və şagirdlərin sayının artdığını qeyd edib. Belə ki, 1923-cü ildə Azərbaycanda 65 min şagirdin təhsil aldığı 925 birinci səviyyəli məktəb var idisə, hazırda 95 min şagirdin təhsil aldığı1114 məktəb var. Həmin ildə 4000 şagirdin təhsil aldığı 26 ikinci səviyyəli məktəb var idisə, indi 6500 şagirdin təhsil aldığı 42 məktəb var. Ali təhsil müəssisələrində 3200 tələbə var idisə, indi 4200 tələbə var.
Pedaqoji məktəblərdə bir il əvvəl 1000-ə yaxın, indi 2000-ə yaxın, fəhlə fakültələrində də bir il əvvəl 1000-ə yaxın, indi 1800-dən çox insan təhsil alır. Halbuki həm təhsil müəssisələrinin sayı, həm də tələbələrin sayı daha da arta bilərdi.
Belə ki, rayonlarda məktəb yaşlı uşaqların cəmi 35%-i məktəbə gedir. Eyni zamanda, türk uşaqlarının məktəb təhsilinə olan həvəsi güclənir: müharibədən əvvəlki dövrdə məktəblərdə 14 min nəfər oxumaq əvəzinə, indi 59 min nəfər təhsil alır. Bu il yerli icraiyyə komitələrinin və Xalq Maarif Komissarlığının vəsaiti hesabına 200 məktəb binası tikiləcək. Təəssüf ki, türkdilli müəllim çatışmazlığı var.
Azərbaycan Xalq Maarif Komissarlığının nəşriyyat işi yaxşılaşır.
Türk məktəbləri dərsliklərlə təmin olunur. Pedaqoji institutlar, türkdilli müəllimlər seminariyaları lazımi səviyyədədir, bu müəssisələrin tələbələri yüksək ixtisasa malik olacaqlar. Ali təhsil ocaqlarında türklərin sayı artıb. Tezliklə Azərbaycanda kifayət qədər ali elmi hazırlığı olan insanlar yetişəcək.
Azərbaycanda 18 000-dən çox şagirdin təhsil aldığı 761 savadlılıq mərkəzi fəaliyyət göstərir.
