Rusiyada miqrantlar üçün fərdi gəlir vergisinin 30%-ə qədər artırılması təklif edilir.
Diaspora.TV rus mediasına istinadla xəbər verir ki, qanun layihəsi Dövlət Dumasına təqdim edilmək üçün Leonid Slutskinin rəhbərlik etdiyi LDPR fraksiyası tərəfindən hazırlanıb.
Qanun layihəsinin konsepsiyası xarici vətəndaşlara münasibətdə vergi sisteminin əsas parametrlərinə yenidən baxılması və sosial, iqtisadi sahədə genişmiqyaslı milli problemlərin həlli üçün Rusiya Federasiyasının büdcə sisteminin gəlirlərinin artırılması ehtiyacına yönəlib.
Qeyd olunur ki, təkcə 2022-ci ildə Rusiya Federasiyasında il ərzində işləmək üçün icazə almış əcnəbi vətəndaşların sayı 2164,6 min nəfər təşkil edib ki, onlardan 2035 min nəfərin əmək fəaliyyətini həyata keçirmək üçün etibarlı patenti var. 2023-cü ildə bu göstərici sənəddə göstərildiyi kimi faktiki olaraq oxşar idi.
"Rusiya Federasiyasının Vergi Məcəlləsinin 224-cü maddəsinin 3-cü bəndinə uyğun olaraq, Rusiyanın vergi rezidenti olmayan fiziki şəxslərin əldə etdiyi bütün gəlirlər üçün 30% vergi dərəcəsi nəzərdə tutulur. Eyni zamanda, patent əsasında haqqı ödənilən əmək fəaliyyəti ilə məşğul olan xarici vətəndaşların gəlirləri bu normanın tələblərinə tabe deyil. Göstərilən gəlirə münasibətdə vergi dərəcəsi mütərəqqi vergi miqyasına uyğun müəyyən edilir”, - deyə müəlliflər qanun layihəsində izah edir və bunun düzəldilməsini təklif edirlər.
“Son illər daha çox əcnəbi işləmək üçün Rusiyaya gəlməyə çalışır. Bu gün miqrantların demək olar ki, üçdə ikisi patent əsasında muzdlu işçi kimi çalışır və onlar qazandıqları pulun hamısını xaricə ailələrinə göndərirlər. Amma biz hesab edirik ki, əcnəbi mütəxəssislərin gəlirləri Rusiya büdcəsi üçün işləməlidir”, - deyə Leonid Slutski qanun layihəsinin hazırlanmasının səbəbini izah edib.
Onun sözlərinə görə, bu, büdcəni əlavə gəlirlərlə doldurmağa imkan verəcək ki, bu da şəhər və kəndlərin inkişafına, o cümlədən uşaqlı ailələrə və digər sosial əhəmiyyətli sahələrə dəstək tədbirlərinin həyata keçirilməsinə sərf olunacaq.
Qanun layihəsi avqustun 5-də təsdiq üçün hökumətə göndəriləcək.
