“Ölkəmizdən kənarda milli maraqlara xidmət edən və diaspor fəaliyyəti ilə məşğul olan azərbaycanlılar az deyil. Onlar Azərbaycan naminə böyük işlər görürlər”.
Bu sözləri Diaspora.TV-yə açıqlamasında politoloq Yeganə Hacıyeva deyib. O, hesab edir ki, 44 günlük Vətən müharibəsi və ondan sonrakı dövrdə Azərbaycandan kənarda yaşayan soydaşlarımızın gördüyü işləri danmaq olmaz:
“Xarici ölkələrdə təhsil alan tələbələr 44 günlük Vətən müharibəsi zamanı Azərbaycana yönəlmiş anti-təbliğatın qarşısının alınmasında böyük rol oynadılar. Həmin tələbələrin bəzilərini tanıyıram. Nə oradakı diaspor təşkilatları, nə də Azərbaycandakı hər hansı qurumun onları mükafatlandırması barədə məlumatım yoxdur. Əslində, tələbələrin gördüyü işlər hansısa bir mükafatla ölçülə bilməz, onlar vətənə olan sevgidən bu işləri görüblər. Amma həmin gənclərin səfirliklərə, diaspor mərkəzlərinə çağırılması, çay süfrəsinə dəvət olunması çox yaxşı olardı. Nəticə olaraq, bütün bunlardan Azərbaycan qazana bilərdi", - deyə Yeganə Hacıyeva bildirib.
Jalə
Diaspora.TV
