Moskva Arbitraj Məhkəməsi Federal Vergi Xidmətinin (FTS) azərbaycanlı bloger Hüseyn Həsənova qarşı iddiası üzrə icraata xitam verib.
Diaspora.TV xəbər verir ki, bu barədə Life SHOT məlumat yayıb.
Avqustun 16-da bloger Federal Vergi Xidmətinə 145 milyon rubl məbləğində bütün borclarını ödəyib. Bundan əvvəl vergi orqanları blogerin dörd bankdakı hesablarını bloklayıb, həmçinin məhkəmə yolu ilə Moskva şəhərinin hündürmərtəbəli binalarından birində, dəyəri 150 milyon rubl olan Neva Towersdəki mənzillərini əlindən almağa çalışıb.
Federal Vergi Xidməti həmçinin Həsənovdan iki avtomobili - 2020-ci il istehsalı olan Rolls-Royce Cullinan və 2022-ci il istehsalı olan Chevrolet Tahoe avtomobillərini götürmək niyyətində idi.
Telegram kanalı vurğulayıb ki, bütün borclarını ödəyən Həsənov “evini və lüks avtomobillərini xilas edə bilib”. Borc ödənilən gün onun bank hesabları blokdan çıxarılıb .
Blogerin hazırda xaricdə olduğu bildirilir. Onun vəkili kanala bildirib ki, Həsənov xarici agentləri qarşısında bütün öhdəliklərini yerinə yetirən kimi Moskvaya qayıdacaq.
