“Diasporla müsahibə”nin növbəti qonağı Kanadanın Toronto şəhərində yaşayan həmyerlimiz, Ana dili məktəbinin rəhbəri Yeganə Cəfərova olub.
Müsahibə zamanı Y.Cəfərova müəllimlik fəaliyyətindən və Torontodakı diasporumuzdan bəhs edib.
Qonaq bildirib ki, çətin də olsa Kanadada Azərbaycan dilini öyrədir və yaşadır:
“Bu işdə Diasporla İş üzrə Dövlət Komitəsi və onun nəzdində fəaliyyət göstərən Diaspora Dəstək Fondundan heç bir kömək yoxdur. Müraciət etdik, onlar bizə elektron kitab göndərdilər. O kitab da işimizə yaramadı. Çünki burda təhsili fərqli üsullarla keçirlər”.
Azərbaycanlı fəal vətənimizin tanıtımı istiqamətində həyata keçirdiyi layihələri öz hesabına reallaşdırdığını qeyd edib.
Y.Cəfərova Kanadada erməni diasporunun güclü olduğunu, yüksək vəzifələr tutduqlarını bildirib:
“Hətta farslar belə bir sıra qrumlarda təmsil olunurlar. Təəssüf ki, biz azərbaycanlılar barədə bu sözü deyə bilmirik”.
Qonağımız Torontoda ticarət mərkəzlərində Azərbaycan mağazaları, şəhərdə restoranların açılmasını arzuladıqlarını ifadə edib:
“Bir-iki restoran var. Təbii ki, bu iş daha çox kommersiya maraqlarından irəli gəlir. Amma olsa daha yaxşı olar”.
Y.Cəfərova Kanadada “Azərbaycan evi”nin fəaliyyət göstərdiyini etiraf etsə də onlarla heç bir əlaqəsinin olmadığını vurğulayıb.
