Azərbaycanlı bəstəkar və pianoçu Şahin Növrəslinin Parisin Louis Vuitton Fondunda unikal konserti olub. Konsertlə bağlı Fransanın "La Gazette" nəşrində maraqlı yazı dərc olunub.
Diaspora.TV həmin yazını olduğu kimi təqdim edir:
“Muğam”, Azərbaycanın ənənəvi musiqisi və Amerika cazını özündə birləşdirən unikal musiqi aləmini yaradan bu dahi sənətkarı hər kəs alqışlayır. Şahin Növrəsli tez-tez Ari Hoeniq, Natan Pek və Əhməd Camal kimi caz ulduzları ilə birgə çıxış edib. Məhz bu dəfə solo sənətçi kimi o, öz əsərlərini və caz standartlarını ifa etdi.
Şahin Növrəsli 1977-ci il fevralın 10-da Bakıda anadan olub. On bir yaşından Azərbaycan Milli Filarmoniya Teatrında Faiq Mustafayevin rəhbərliyi ilə Simfonik Orkestrlə çıxış edib. Sonra müsabiqə və festivallarda Bax, Bethovenin, Motsartın, Raxmaninovun əsərlərini ifa edib. O, bəstəkar və pianoçu Vaqif Mustafazadənin yaradıcılığından ilhamlanaraq caza, daha dəqiq desək, onun Azərbaycan estradasına, caz-muğama doğru irəliləyib.
1996-cı ildə Şahin Növrəsli Üzeyir Hacıbəyov adına Azərbaycan Milli Konservatoriyasına daxil olub. Peşəkar karyerasına başlayan o, Azərbaycan xalq mahnılarını caz üslubunda ifa edərək “Məhəbbət şəlaləsi” (Sevda şəlaləsi) və “Min bir gecə” mahnılarını bəstələyib. O, iki albom yazdırıb, ABŞ, İtaliya, Türkiyə və Rusiyada konsertlər verib.
Caspian Jazz & Blues Festival (Bakı), Hot Summer Jazz Festival (Minneapolis, Amerika Birləşmiş Ştatları), Black Sea Cazz Festival (Soçi, Rusiya), Antalya Beynəlxalq Piano Festivalı (Türkiyə), Bakı Caz Festivalı kimi bir çox beynəlxalq caz festivallarında iştirak edib.
O, ilk dəfə Fransaya 2000-ci illərin əvvəllərində azərbaycanlı mədəniyyət mütəxəssisi Aytən Muradovanın təşəbbüsü ilə Parisdə “Studio de l'Ermitage”də təşkil olunan konsertə gəlib. Daha sonra o, 2007-ci ildə Die şəhərindəki Est-Ouest festivalında iştirak edib.
