İsraildəki Yəhudi Agentliyi və azərbaycanlı ravvinlər Şərqi Qüdsdə İranla əlaqəli casus şəbəkəsində 7 şübhəlinin həbsindən sonra keçmiş Sovet İttifaqından olan mühacirlərə qarşı ittihamlara sərt cavab veriblər.
Qeyd edək ki, sözügedən həbslər mübahisələrə səbəb olub və bəzi israilli şərhçilər Azərbaycandan və digər postsovet ölkələrindən olan mühacirlərin casusluğa daha çox meylli ola biləcəyi ehtimalını irəli sürüblər və bu, həm Yəhudi Agentliyinin, həm də Azərbaycan Yəhudi İcmasının qəzəbinə səbəb olub.
Yəhudi Agentliyinin Azərbaycandakı fəxri səfiri, məşhur politoloq Roman Qureviç “The Jerusalem Post”a açıqlamasında “Siz nifrət və nifaq səpə bilməzsiniz” deyib. O, xüsusilə casusluq iddiaları kontekstində İsrail cəmiyyətini etnik zəmində bölmək cəhdlərini pisləyib:
“Müharibə zamanı vətənə xəyanət edən hər bir vətəndaş ən ağır cəzaya layiq olan degenerativdir. Ancaq xainləri mənşəyinə və ya yəhudiliyinə görə markalamaq ayıbdır”.
Qüdsün şərqindəki Beyt Səfafa məhəlləsinin yeddi sakininin iştirak etdiyi həbslər sədaqətlə bağlı daha geniş söhbətə səbəb olub və siyasi şərhçi Amit Sehqal milli televiziyada keçmiş Sovet İttifaqından olan qeyri-yəhudi mühacirlərin maddi qazanc müqabilində İsrailə xəyanət etməyə daha çox hazır ola biləcəklərini iddia edib. Sehqalın sözləri ölkə daxilində etnik parçalanmaları qızışdırdığı üçün kəskin tənqidlərə səbəb olub.
Qureviç bu açıqlamalara ictimaiyyəti mühacirlərin İsrailə verdiyi töhfələri xatırlamağa çağıraraq, onların da yerli israillilər kimi vətən uğrunda döyüşdüklərini və həlak olduqlarını qeyd edib. O, “İsrail dövlətini quran və yaradan müxtəlif ölkələrdən olan həm yəhudi, həm də qeyri-yəhudi olan immiqrantlar şübhəyə deyil, hörmətə layiqdirlər” deyib.
Artan reaksiya ilə yanaşı, azərbaycanlı ravvinlər də bu iddialardan şok və qəzəblərini ifadə ediblər.
Bakıdakı Sefarad gürcü icmasının ruhani lideri ravvin Zamir İsayev Azərbaycanı casus şəbəkəsi ilə əlaqələndirən ittihamları “əsassız və zərərli” adlandırıb. Ravvin İsayev vurğulayıb ki, əsas şübhəli Əziz Nisanov 1989-cu ildə Sovet İttifaqı dövründə uşaq ikən İsrailə mühacirət edib və Azərbaycan vətəndaşı deyil. “Onun əli olmaqda şübhəli bilinən övladları İsraildə doğulub və Azərbaycanla heç bir əlaqəsi yoxdur”, - İsayev izah edib.
Azərbaycan niyə ittihamlarla əlaqələndirilir?
O, həmçinin qeyd edib ki, Azərbaycan yəhudilərinə qarşı ittihamlar Azərbaycanın İsraillə çoxdankı yaxın münasibətlərini nəzərə alsaq, xüsusilə zərərlidir.
“İsrail üçün dost ölkə olan Azərbaycanın bu cür ittihamlarla necə əlaqələndirilməsi anlaşılmazdır. Bu saxta ittihamlar İsrail ordusunda, polisdə və ondan kənarda İsrailə sədaqətlə xidmət edən 80 min azərbaycanlı yəhudiyə ziyan vurur”, - deyə o, azərbaycanlı mühacirlərin İsrail cəmiyyətinə mühüm töhfələrini vurğulayıb.
