Rumıniya, Macarıstan, Gürcüstan və Azərbaycan ötən həftə Şərqi Qafqazdan Avropa İttifaqına daha çox bərpa olunan enerji çatdırmaq məqsədilə Qara dənizin dibi ilə elektrik xəttinin çəkilməsi üzrə birgə təşəbbüslə çıxış ediblər.
Diaspora. TV “İndependent” nəşrinə istinadlə xəbər verir ki, 2022-ci ildə dörd ölkənin liderləri tərəfindən təsdiqlənən layihə, Rusiyanın Ukraynaya genişmiqyaslı işğalına başlamasından və qiymətlərin kəskin artması ilə Aİ-nin Rusiya enerjisindən asılılığını vurğuladıqdan sonra sürət qazanıb. 27 dövlətdən ibarət İttifaq o vaxtdan bəri özünü Rusiya enerjisindən ayırmağa çalışır.
Kabel xətti Xəzər dənizindəki külək stansiyalarında elektrik enerjisi istehsal etmək üçün böyük potensiala malik olan Azərbaycanı Gürcüstan vasitəsilə Aİ üzvləri Rumıniya və Macarıstanla birləşdirəcək.
Dörd ölkənin hökumət nazirləri ötən həftə çərşənbə axşamı Rumıniyanın paytaxtında keçirilən görüşdə birgə təşəbbüslə çıxış edərək bildiriblər ki, layihə enerji təhlükəsizliyini gücləndirməyə və istehlakçılar üçün elektrik enerjisinin qiymətlərini aşağı salmağa kömək edəcək.
Rumıniyanın energetika naziri Sebastian Burduja bildirib ki, layihə onun ölkəsi və Aİ üçün strateji əhəmiyyət kəsb edir:
"Son bir neçə ay ərzində Avropanın enerji xəritəsinə baxsanız görərsiniz ki, şərq cinahında biz son vaxtlar çox yüksək qiymət ödəmişik - və bu, kifayət qədər diversifikasiya olmadığındandır".
Azərbaycanın energetika naziri Pərviz Şahbazov bildirib ki, bərpa olunan enerjidən istifadə iqlim dəyişikliyi problemlərinin həllinə kömək edəcək. O, sualtı xəttin enerji təhlükəsizliyi üçün vacib olduğunu deyib, "lakin o, həm də beynəlxalq ictimaiyyətin gündəmində çox mühüm yer tutan yaşıl enerjini təmin edəcək".
Çərşənbə axşamı keçirilən iclasda Bolqarıstanın energetika nazirinin müavini də iştirak edib və Aİ üzvünün infrastruktur layihəsində iştirakı ilə bağlı müzakirələr aparılıb. Burduja və Şahbazov bildiriblər ki, layihə ilə bağlı növbəti görüşün bu ilin sonunda Azərbaycanda keçiriləcək BMT-nin iqlim dəyişikliyi iclasında olacaq.
