“Gürcü diasporunun gücləndirilməsi və xaricdə yaşayan soydaşların qayğısına qalmaq hökumətin “ən mühüm məqsədlərindən birini” təşkil edir”.
Diaspora.TV xəbər verir ki, bu barədə açıqlama ilə Gürcüstanın Baş naziri İrakli Kobaxidze Diaspor Gününə həsr olunmuş forumda deyib.
İ.Kobaxidze bu öhdəliyin 2017-ci ildə Gürcüstan Konstitusiyasında öz əksini tapdığını qeyd edərək, ölkənin “nadir istisnalardan biri” olduğunu, hökumətin xaricdə yaşayan soydaşlarına daim qayğı göstərməyə və onların vətənlə əlaqəsini saxlamağa borclu olduğunu qeyd edib. O mühacirətdəki gürcülərə müraciət edərək, deyib ki, siz Gürcüstanın bir növ səfirisiniz.
İ.Kobaxidze həmçinin vurğulayıb ki, Gürcüstan hökumətinin “vacib məqsədi” xaricdə yaşayan soydaşlarımızın, o cümlədən gənclərin ixtisas, bilik və təcrübələrini ölkə rifahı üçün istifadə etməkdir. Bu “əvəzolunmaz insan resursundan, əlaqələrdən və biliklərdən ümumi vətənimizin gələcək tərəqqisi və inkişafı üçün istifadə etmək” üçün bir sıra proqramlar həyata keçirilib.
Qeyd edilib ki, Gürcüstan “Sağlamlıq üçün İnsan Resursları haqqında” Dublin Bəyannaməsini imzalayan ölkədir və qlobal diaspora siyasətinə vahid yanaşma və baxışın işlənib hazırlanması, diasporaların gücləndirilməsi və cəlb edilməsi üçün yeni mexanizmlərin yaradılması üçün Birləşmiş Millətlər Təşkilatının və beynəlxalq ictimaiyyətin səylərinə qoşulur.
Baş nazir həmçinin qeyd edib ki, hökumət “Xaricdə yaşayan soydaşlar və diaspor təşkilatları haqqında” qanuna “diasporumuzun ölkənin inkişaf prosesində iştirak etməsi üçün bütün şəraiti yaratmaq məqsədi ilə növbəti sessiyada ölkə parlamentinə əlavələr paketi təqdim edəcək. Müasir dəyişən mühitdə görünməmiş çağırışları və imkanları nəzərə alaraq bunu edirik”.
Bildirilib ki, Beynəlxalq Miqrasiya Siyasətinin İnkişafı Mərkəzi və diaspora məsələlərinin araşdırılması istiqamətində dünyanın aparıcı akademik institutlarından olan Maastrixt Universiteti ilə əməkdaşlıq edilir.
İ.Kobaxidze əlavə edib ki, hökumətin xaricdə yaşayan həmvətənləri ilə bağlı “narahatlığı” ölkənin iqtisadi inkişafı fonunda qaçılmaz olaraq artacaq. O, gürcü diasporunun hər bir nümayəndəsinin öz vətənlərinə qayıtması arzusunu da ifadə edib.
V.Əli
Diaspora.TV
