“Azərbaycan həqiqətlərinin tanıdılması ilə bağlı Qazaxıstanın Türkistan şəhərində ilk beş il ərzində fəal tələbə olaraq, son bir il ərzində isə diaspora əməkdaşı olaraq fəaliyyət göstərərək öz ölkəmi təmsil etmişəm”.
Bu sözləri Diaspora.TV-yə açıqlamasında Qazaxıstanda yaşayan diaspor fəalı Ehtiram Musayev deyib:
“Əvvəlcə, Xocalı soyqırımı, Bayraq günü və Zəfər Bayramı kimi tədbirlərin həyata keçirilməsində yaxından dəstək olmuşam. Sonrakı illərdə Azərbaycanı Türkistan şəhərindəki Əhmət Yəsəvi Universitetində təmsil etmişəm”.
Müsahibimiz diaspor sahəsində az təcrübəsinin olduğunu vurğulayaraq, bu sahədə önəmli məsələ kimi elm və təhsilin üstünlüyünü qeyd edib:
“Dünyanın istənilən yerində yaşayan azərbaycanlı öz ana dilində yazıb- oxumağı bacarmaqla yanaşı, həm də ölkəsinin mədəniyyətindən, gördüyü işlərdən xəbərdar olmalı və onu göstərməlidir. Əsasən də bu məsələdə xaricdə yaşayan azərbaycanlıların qısa müddət ərzində də olsa, bir dönəmlik (semestr) Azərbaycan universitetlərində oxuma imkanı yaradılmalıdır. Onlar ancaq bu şəkildə Azərbaycanla ən yüksək və keyfiyyətli şəkildə tanış ola və dili mənimsəyə bilərlər. Tez-tez televiziya və radio proqramlarına dəvət alan biri kimi deyə bilərəm ki, Azərbaycan diasporunun xarici mediaya çıxış imkanlarında iki məsələ çox önəmlidir: dil və kütləvilik. Televiziya proqramları tərcümə olunmalı və daha geniş kütləyə çatdırılmalıdır. Eləcə də Azərbaycan telekanalları ilə telekörpü bu məsələdə çox gözəl və sınanmış ideyadır”.
Həsən Hüseynov
Diaspora.TV
