Stavropol diyarının Pyatiqorsk şəhərində fəaliyyət göstərən “Araz" Azərbaycan Milli-Mədəni Muxtariyyətinin sədri Təhmasib Zeynalov, Gənclər təşkilatının rəhbəri Araz Məhərrəmov, qurumun hüquqşünası Elçin Cənnətov və təchizatçısı – informasiya işinə məsul Murad Muradov Rusiya Federal Təhlükəsizlik Xidmətinin əməkdaşları tərəfindən saxlanılıblar.
Diaspora.TV xəbər verir ki, “Araz" Azərbaycan Milli-Mədəni Muxtariyyətinin ofisində həyata keçirilən əməliyyatdan sonra saxlanılanlar Federal Təhlükəsizlik Xidmətinin (FTX) Stavropol Regional Mərkəzinə aparılıb.
Əməliyyat zamanı azərbaycanlılarla yanaşı, özbək və taciklərdən ibarət qrupların da saxlanıldığı vurğulanır. Onların yaşayış izni almaq üçün rus dili imtahanı ilə bağlı saxta sənəd düzəltdikləri iddia olunur.
Foto: Təhmasib Zeynalov
İddiaya görə, Pytiqorski şəhərindəki diaspor fəallarımız azərbaycanlılara və özbəklərə - ümumilikdə isə 11 nəfərə sənəd düzəltməkdə ittiham olunurlar. Onların konkret şikayət əsasında saxlanıldıqları bildirilir.
Məlumata görə, Milli-Mədəni Muxtariyyətin sədri Təhmasib Zeynalov, Gənclər təşkilatının rəhbəri Araz Məhərrəmov və təhcizatçı – informasiyaya məsul Murad Muradov saxlanıldıqdan bir neçə saat sonra başqa yerə getməmək şərtilə sərbəst buraxılıblar.
Foto: Araz Məhərrəmov
Azərbaycan Milli-Mədəni Muxtariyyətinin hüquqşünası Elçin Cənnətov isə FTX-nin Stavropol Regional Mərkəzində saxlanılır, haqqında cinayət işi qaldırılıb.
Hazırda faktla bağlı araşdırma gedir.
Diaspora.TV hadisənin təfərrüatını öyrənmək üçün Azərbaycan Milli-Mədəni Muxtariyyətinin sədri Təhmasib Zeynalovla əlaqə saxlamağa cəhd edib. Lakin T.Zeynalov gün ərzində etdiyimiz zənglərə və yazdığımız mesajlara cavab verməyib.
Foto: Elçin Cənnətov
Sərbəst buraxılan Azərbaycan Milli-Mədəni Muxtariyyətinin təchizatçısı – informasiyaya məsul Murad Muradov isə Diaspora.TV-yə faktı təsdiqləyib. Qeyd edib ki, o və digərləri həqiqətən də saxlanılıb, bir neçə saatdan sonra sərbəst buraxılıblar:
“Nədə ittiham olunduğumuzu dəqiq deyə bilmərəm, araşdırma gedir. Əməliyyat zamanı mən ofisdə olmamışam, amma otağımda araşdırma aparılıb. Məni, T.Zeynalovu və A.Məhərrəmovu elə həmin gün buraxdılar, Elçin Cənnətovu isə buraxmayıblar. Yəqin ki, məhkəmə zamanı hər şey aydın olacaq. Təkcə azərbaycanlıları deyil, özbəkləri və tacikləri də saxlayıblar”.
Foto: Murad Muradov
Diaspora.TV
