“Avropada Azərbaycana qarşı informasiya müharibəsi hər zaman olub. Xüsusən də Birinci və ikinci Qarabağ müharibəsi dövründə gördük ki, Azərbaycanı sevməyən qüvvələr, Azərbaycana qarşı informasiya müharibəsi aparırlar”.
Bu fikirləri Diaspora.TV-yə açıqlamasında Azərbaycan Mətbuat Şurası İdarə Heyətinin üzvü Hacıbəy Heydərli deyib.
H.Heydərli əlavə edib ki, Vətən müharibəsi, xüsusən də anti-terror əməliyyatlarından sonra Avropa ölkələrinin bəziləri, xüsusən Fransa Azərbaycana qarşı düşmən münasibəti sərgiləyir:
“Fransanın Azərbaycana qarşı açdığı informasiya müharibəsində diasporun üzərinə böyük iş düşür. Azərbaycan həqiqətləri ilə bağlı sosial şəbəkələrdə təbliğat işləri gücləndirilməlidir. Eyni zamanda, Avropa KİV-də Azərbaycan həqiqətləri bizi sevməyənlərə qarşı cavablarımızda əks olunmalıdır”.
H.Heydərli qeyd edib ki, xarici dil bilən jurnalistlərimiz, diaspora rəhbərlərimiz bu prosesdə daha aktiv iştirak etməlidirlər.
“Azərbaycana qarşı dezinformasiya, “fakenews” yayanlarara qarşı daha güclü mübarizə aparmalıyıq. Təəssüf ki, diaspor rəhbərləri və Avropada yaşayan soydaşlarımızın Azərbaycanla bağlı neqativ xəbər yayan xarici media qurumlarına təsir gücü az olur. Və çox nadir hallarda onların bu kimi məsələlərdə açıqlamalarını görə bilərik. Təbii ki, istisnalar da var... Amma bütövlükdə bu məsələlərə ciddi yanaşmaq və aktivlik göstərmək lazımdır”.
H.Heydərli əlavə edib ki, xarici dil bilən jurnalistərimiz, diaspor rəhbərlərimiz Avropanın bu cür çirkin önləminə qarşı bir cəbhədə birləşməli və Azərbaycana qarşı kampaniya aparanlara layiqli cavab verməlidir:
“Vətən müharibəsi günlərində biz bunun şahidi olmuşuq. Cənab Prezident İlham Əliyev 44 gündə 30-dan çox müsahibə verdi və həm də informasiya müharibəsinin döyüşçüsü kimi Avropa ölkələrinə qalib gəlməyi bacardı”.
Həsən Hüseynov
Diaspora.TV
