“Fransanın Azərbaycandakı səfirini müzakirə üçün geri çağırması, iki ölkə arasında artan siyasi ziddiyyətin və yaranmış anlaşılmazlıqların təzahürüdür”.
Bu fikirləri Diaspora.TV-yə Fransada yaşayan azərbaycanlı jurnalist Elnur Məcidli deyib. Onun sözlərinə görə, iki ölkə arasındakı əlaqələrin zədələnməsində, Fransadakı erməni diasporunun və lobbisinin rolu böyükdür:
“Xüsusən, 2-ci Qarabağ müharibəsindən sonra Azərbaycanın əldə etdiyi möhtəşəm zəfərlə öz torpaqlarını işğaldan azad etməsi və erməni separatçılarını məhkəmə qarşısına çıxarması, dünyadakı erməni diasporunu daha da aqressivləşdirdi. Buna paralel olaraq, biz müxtəlif ölkələrdə Azərbaycan səfirliklərinə erməni diasporunun vandal hücumlarının şahidi olduq. Bununla belə, hər nə qədər erməni diasporu, Fransanın siyasi administrasiyasına öz təzyiqlərini davam etdirsə də, Fransa ictimaiyyəti, bu məsələdə daha təmkinlidir, əksəriyyət, Azərbaycanla əlaqələrin inkişaf etdirilməsindən və Azərbaycanı daha yaxından tanımaqdan yanadır”.
E.Məcidli bildirib ki, xüsusilə, Ukrayna müharibəsi və Rusiya ilə Avropa Birliyi arasında hər gün daha da böyüyən iqtisadi-hərbi konflikt fonunda, Azərbaycan neftinin və qazının Avropa Birliyinə ixracatı və bu ixracatın daha da genişləndirilməsi, Fransa üçün xüsusi əhəmiyyət kəsb edir:
“Avropa Birliyinə üzv ölkələrlə, o cümlədən Fransa və fransız şirkətlərlə bağlanmış enerji müqavilələri, Azərbaycanı bu gün əhımiyyətli tərəfdaş səviyyəsinə yüksəldib. Bu baxımdan, hər iki ölkə arasında bir müddətdir davam edən dalğalı əlaqələrin zamanla stabilləşəcəyinə və yenidən inkişaf istiqamətinə yönələcəyinə inanıram”.
E.Məcidli vurğuladı ki, Fransadakı Azərbaycan diasporu da gücləndikcə, inkişaf etdikcə bu ölkədəki erməni diasporunun təktərəfli təbliğatı iflasa uğrayacaq:
“Hansı ki, bu proses artıq başlayıb, bir az daha zamana ehtiyac var. Fransada sayları erməni diasporunu üstələyən türk-azərbaycanlı diasporunun birlikdə hərəkət etməsi, yaxın gələcəkdə öz bəhrəsini verəcəkdir”.
Bəxtiyar Məmmədli
Diaspora.TV
