“Ölkəmizə xaricdən jurnalistlər və blogerlərin dəvət olunması müsbət haldır”.
Bu sözləri Diaspora.TV-yə açıqlamasında “Yeni Sabah” saytının baş redaktoru Seymur Verdizadə deyib. O bildirib ki, antiterror əməliyyatından sonra Azərbaycana qarşı ən müxtəlif cəbhələrdə hücumlar başlayıb:
“Başda Fransa olmaqla Avropa, hətta ABŞ bu kampaniyada öncüllük edir. İnsan hüquq və azadlıqları, söz və mətbuat azadlığı arxa plana keçib. Avropa yüz illərdi söykəndiyi dəyərlərə arxa çevirib. Onlar Azərbyacanın haqq işinə kölgə salmağa çalışır. Hətta diaspora nümayəndələrinin ödənişli əsaslarla Azərbaycan mətbəxini təbliğ edən tribunaları da qapadılıb. Bununla bağlı konkret faktlar var. Təəssüf ki, söz və mətbuat azadlığına tamamilə zidd olan bu davranışlar Fransa mətbuatı tərəfindən sərgilənir”.
Baş redaktor əlavə edib ki, Azərbaycan ikili standartların bariz nümunəsi ilə üz-üzədir:
“Belə bir vaxtda ölkəmizə xaricdən jurnalistlər və blogerlərin dəvət olunması doğru seçimdir. Sadəcə, onlarla koordinasiyalı iş aparmaq lazımdır. Çalışmaq lazımdır ki, onların Azərbaycan təəssübkeşliyi davamlı xarakter alsın. Onlar öz ölkələrində Azərbaycana qarşı aparılan çirkin kampaniyaya qoşulmamaqla yanaşı, həm də bu iyrənc prosesə etiraz etsinlər, müqavimət göstərsinlər”.
Baş redaktor hesab edir ki, Azərbaycan jurnalistləri xaricdən gələn həmkarları vasitəsilə dünya mətbuatına çıxa bilərlər:
“Mövcud əlaqələri daha effektiv platformaya çevirməyin vaxtı çatıb”.
Jalə
Diaspora.TV
