“Ölkəmiz müstəqillik qazanandan sonra, xüsusilə də Azərbaycanın siyasi, informativ, bir sıra hallarda diplomatik izolyasiyaya məruz qalması fonunda diaspora işi, yəni dünyanın müxtəlif ölkələrinə səpələnmiş azərbaycanlıların vahid mərkəzdə birləşməsi dövlət siyasətinin önünə çıxdı. Ulu öndər tərəfindən müvafiq qurumun yaradılması deyə bilərik ki, Vətən müharibəsində qələbəmizə gedən yolda önəmli rol oynadı”.
Bu fikirləri Diaspora.tv-yə açıqlamasında Milli Məclisin deputatı, Sosial Tədqiqatlar Mərkəzinin İdarə Heyətinin sədri Zahid Oruc deyib.
Onun sözlərinə görə, beynəlxalq münasibətlər sisteminin, xüsusilə də dünya düzəninin dəyişməsi, yeni təhlükələrin və çağırışların meydana çıxması, dünənə qədər dünya erməniçiliyi arxasında gizlənən, amma bu gün səhnəyə açıq çıxan qüvvələrlə mübarizə yönündə diaspora işinə yeni münasibət tələb olunur:
“Biz mediada ötən illər ərzində həyata keçirilən tədbirlərin daha sistemli, əhatəli xarakter daşıdığını görürük. Əlbəttə ki, diaspor fəaliyyəti bir qədər də mürəkkəb xarakterə malikdir. Ölkələr biri-birindən siyasi quruluşlarına, münasibətlər sisteminə görə fərqlidir. Xaricdə yaşayan soydaşlarımızın bir qismi daimi olaraq məskunluşma yerinə malik deyillər. Yaxud da, tez-tez yaşadıqları yerləri dəyişir və buna görə də konkret şəxslər üzərində sabit siyasətin qurulması o qədər də asan deyil. Digər tərəfdən, müxtəlif qüvvələr xarici məkanda Azərbaycan əleyhinə təşkilatlandırılır və informasiya strukturlarına çıxışları təmin edilir, himayə olunur, tezislər verilir. Daimi olaraq onlara maliyyə imkanı yaradılmaqla 7/24 saatlıq rejimdə fəaliyyətləri təmin olunur. Bütün bunların kontekstində azərbaycanlıların bir tərəfdən milli-mədəni varlıqlarının qoruyub saxlanması, məktəblərinin yaradılması, daha sonra ictimai cəhətdən təşkilatlanmaları, yaşadıqları ölkənin ictimai-siyasi həyatına təsir imkanları, dövlət strukturunda təmsilçilikləri və vacib anda Azərbaycanın hər hansı bir çağırışına səs vermələri tələb olunur. Komitə bu məsələlərdə fəal rol oynayır və üzvü əlaqəni təmin edir. Artıq beynəlxalq cəbhədə Azərbaycan əleyhinə aparılan mübarizənin qarşısına ilk olaraq diaspor və yaxud da lobbi qüvvələrimiz çıxır”.
Z.Oruc bildirib ki, ölkə rəhbəri Türkiyə dövləti və xalqı ilə diaspor istiqamətində də fəaliyyətlərimizin bir araya gətirilməsi üçün vahid tədbirlərin, mədəniyyət günlərinin keçirilməsi, akademik səviyyədə birgə fəaliyyət üçün müvafiq tapşırıqlarını verib:
“O cümlədən xatırlayırıq ki, Şuşada diasporumuzun və onun gənclər qolunun bir araya gəlməsi üçün tədbirlər keçirildi. Əlbəttə ki, sonsuz imkanlar var. Misal üçün, Türk dövlətləri birliklərinin diaspor imkanlarının bir araya gətirilməsi yeni baxışlar ola bilər. Amma biz onu nəzərə almalıyıq ki, həmin ölkələr bu sahədə nə dərəcədə strukturlaşmış bir təşkilati modelə malikdirlər. Onlar buna zərurət görürlərmi? Çünki onların bir qismində ümumiyyətlə belə profildə dövlət qurumu yoxdur. Əlbəttə ki, qarşıdakı dövrdə beynəlxalq məkanda vahid bir strateji xətt üzrə fəaliyyət aparmaq üçün ciddi addımların atılmasına ehtiyac ola bilər. Tədqiqat mərkəzi kimi, bu yöndə öz baxışlarımızı işgüzar qaydada komitə ilə bölüşməyə çalışırıq və onlar da bu məsələyə çox açıqdır. Lakin bir sıra hallarda xarici ölkədə rəhbər olmaq uğrunda fərqli baxışlar, münasibətlər toqquşması olur. Bu məsələlərdə daha soyuqqanlı fəaliyyətlər həyata keçirilməlidir ki, Türkiyə və Azərbaycan diaspor qurumları dünya çapında birləşsin, vahid bir təşkilat halında fəaliyyət göstərsin”.
Bəxtiyar Məmmədli
Diaspora.tv
