“Azərbaycandan kənarda yaşayanların sayının Azərbaycanda yaşayanların sayından dəfələrlə çox olması normal hadisədir. İnsanlar müəyyən işlər və yaxud da daha yüksək yaşam standartları, təhsil məsələlərdən dolayı ölkə xaricinə gedir və orada yaşaya bilirlər. Bunun ifrat həddi olmadığı təqdirdə dövlətlər üçün xüsusi bir problemi yoxdur”.
Bu sözləri Diaspora.TV-yə açıqlamasında politoloq Turan Rzayev deyib. Onun fikirincə, dövlətlərin lobbi və diaspora fəaliyyətləri üçün xaricdə yaşayan vətəndaşlarının çox olması müsbət hadisədir:
“Xaricə beyin köçünün normadan çox olmadığı təqdirdə bu tip fəaliyyətlər əslində dövlət maraqlarına xidmət edir. Həm Azərbaycan vətəndaşları, həm də Azərbaycan əsilli soydaşlarımızın ölkə xaricində yaşadıqları bilinir. Bu Azərbaycanın ümumi əhalisindən də çoxdur. Dünya nisbətinə baxdıqda bu gün Azərbaycan xaricində ən çox soydaşlarımızın yaşadığı ölkə İrandır. Bu da tarixi faktorlarla əlaqədardır. Bu gün İranda 25-35 milyon arasında Güney azərbaycanlının yaşadığı deyilir. Avropa, Asiya, Afrika ölkələrində belə Azərbaycan vətəndaşları yaşayır”.
Politoloq hesab edir ki, vətəndaşlarımızın xarici ölkələrdə yaşaması ölkəmizin lobbi və diaspor fəaliyyəti baxımından müsbətdir:
“Bəzi ölkələrdə diaspor fəaliyyətində müəyyən çatışmazlıqlar və narahatlıqlar var. Xüsusi ilə də biz bu kimi narahatlıqları 44 günlük İkinci Qarabağ müharibəsi öncəsində, yəni işğal dövrü zamanı daha çox hiss elədik. Baxmayaraq ki, dövlətin diaspora ilə bağlı proqramları, dəstəyi var”.
Politoloq təəssüf hissi ilə bu sahədə diasporların özündə müəyyən problemlərin olduğunu qeyd edib:
“Diasporların bir-biri ilə əlaqəli olmaması, xaricdə yaşayan vətəndaşların diaspor fəaliyyətinə cəlb edilməməsi və yaxud da müəyyən vasitələrlə cəlbetmə proseslərinin effektiv alınmaması kimi məsələlər var. Ən önəmli məsələlərdən biri bizim strateji tərəfdaş müttəfiq ölkələrlə diasporların təmaslarının koordinasiyalı şəkildə və düzgün qurulmamasıdır. Məsələn, yəhudi və Türkiyə, Rusiya diasporu ilə müəyyən təmasların qurulmasına ehtiyac var. Diasporlarla əməkdaşlıq ancaq bizim işimizə yarayar. Bu gün ən önəmlisi həm də lobbi və diaspor məsələlərinin gücləndirilməsidir”.
T.Rzayev bu istiqamətdə işlərin davamlı və sistemli olmasını məqsədəuyğun hesab edir.
Jalə
Diaspora.TV
Ələkbər Qarayev
Hamıya məlumdu ki, problemlər var, amma konkret hallar izah olunmur. Hansı işlər öndəmdə olmalıdı ki, problemlər aradan qaldırılsın?
25.05.2024 / 16:56