“Diasporla müsahibə”nin növbəti qonağı I Qarabağ müharibəsi iştirakçısı, ehtiyatda olan polkovnik, Qafqaz Tarixi Mərkəzinin Türkiyə təmsilçisi Akif Qasımov olub.
A.Qasımov müsahibədə Türkiyədə fəaliyyət göstərən Azərbaycan diasporu və “Azərbaycan evləri”nin fəaliyyətindən söz açıb.
Qonağımız etiraf edib ki, Türkiyədə Azərbaycanı çox da yaxşı tanımırlar.
Müsahibimiz bunu media qurumlarımızın olmaması, Azərbaycan məktəblərinin qeyri-formal fəaliyyət göstərməsi ilə izah edib:
“Türkiyədə bir sıra ölkələrin kanalları var, hətta ermənilərin belə kanalı var. Lakin Azərbaycan kanalı yoxdur. Biz 90-cı illərin sonları, 2000-lərdən başlayaraq TV kanallarımız vasitəsilə türk müğənnilərini, seriallarını tanıdıq. Belə olan halda da Türkiyəni tanımış olduq. Amma burda Azərbaycan dilli media olmadığı üçün bu bizə böyük problem yaradır”.
A.Qasımovun sözlərinə görə, qardaş ölkə olmağımıza baxmayaraq qardaşlarımız bizi yaxından tanımır, bəzən bizi özlərindən ayrı tuturlar:
“Mən deyərdim ki, hətta bir növ qısqanclıq edirlər. Çünki, biz onlardan daha çox türkük. Mən türklərlə söhbətdə deyirəm ki, biz qardaşıq, etməyin belə. Onların arasında bəziləri erməni mənbələrinə, medialarına əsasən danışır. Onlara deyirəm ki, bizim qaynaqlara baxıb, Qarabağ həqiqətlərini daha yaxından tanıyın. Türkiyədə erməni diasporu çox güclüdür”.
Müsahibimiz bildirib ki, Avropada və eyni ilə də Türkiyədə Azərbaycanı daha yaxşı tanıtmaq lazımdır:
“Diaspor əldə bayraq, küçədə gəzmək demək deyil. Avropada ölkəmizi dəstəkləyən, tanıdan YouTube kanalları açılmalıdır. Təkcə müxalif kanallarla ölkəmizi tanıtmaq düzgün deyil. Soydaşlarımız, media nümayəndələri bir çox ölkələrə üz tutub orada Azərbaycan həqiqətlərindən bəhs etməlidirlər”.
