Böyük Britaniya Daxili İşlər Nazirliyinin otellərində müvəqqəti məskunlaşmış, sığınacaq axtaran, itkin düşmüş onlarla uşaq hələ də tapılmayıb. Onların insan alverinin qurbanı olması ehtimalı ortaya çıxır.
Diaspora.TV xarici mediaya istinadən xəbər verir ki, son rəqəmlər göstərir ki, indiyə qədər 118 himayəsiz uşaq itkin düşüb, onların bəziləri 12 yaşındadır.
Çərşənbə günü dərc edilən hesabat Daxili İşlər Nazirliyinin iddialarına zidd olaraq, otellərə yerləşdirilən uşaqların "insan alverinin qurbanı olma riskinin artması" qənaətinə gələn ilk araşdırmadır.
Ekspertlər bildiriblər ki, son qənaətlər “milli qalmaqal”la bağlı rəsmi araşdırma tələblərini artırıb.
London Universitet Kolleci (UCL) və Ecpat UK-nin sifarişi ilə hazırlanan hesabat, keçən il sığınacaq istəyən onlarla uşağın cinayətkar dəstələr tərəfindən Home Office-in idarə etdiyi otellərdən oğurlandığı ortaya çıxandan sonra hazırlanıb. Son hökumətin ən böyük biabırçılıqlarından biri hesab edilən qalmaqalda gənclərin təhlükəsizliyini təmin etmək üçün əsas yoxlamalar aparılmayıb.
Yeni hesabatda bildirilir ki, insan alverçiləri gənclərlə “saxta" [sosial media] hesabı və ya Facebook vasitəsilə əlaqə saxlayıblar.
Tədqiqatçılar müəyyən ediblər ki, Daxili İşlər Nazirliyinin uşaqları qorumaq cəhdləri əslində onları cinayətkarların əlinə keçirib. Otel işçilərinə gecə boyu uşaqların, xüsusən də albanlar kimi itkin düşmə riski yüksək hesab edilən millətlərdən olan uşaqların qapısını döymək əmri verilib.
Daxili İşlər Nazirliyi Eritreya və Sudan da daxil olmaqla, bir çoxu Afrikadan kiçik qayıqlarla Manş boğazını keçərək Böyük Britaniyaya gələn yetkinlik yaşına çatmayanları yerləşdirmək üçün yeddi otel saxlayır. Bu cür otellər məhkəmə onları qanunsuz elan etdikdən sonra 2021-ci ildən 2024-cü ilin yanvarına qədər fəaliyyət göstərib.
