“Xaricdən azərbaycana gələn blogerlər, media nümayəndələrinin öz missiyası var. Onlar işğaldan azad edilmiş Azərbaycan ərazilərinə səfərlər çərçivəsində əldə etdiyi məlumatları təbii ki, təmsil etdikləri ölkənin media resurslarında işıqlandırır, yaxud da özlərinin platformalarında bu haqda danışırlar. Bu indiki şəraitdə Azərbaycan ərazilərində Ermənistanın törətdiyi vəhşiliklərlə bağlı reallıqların ictimai rəyə çatdırılması üçün vacib komponentlərdən biridir”.
Bu sözləri Diaspora.TV-yə açıqlamasında Əməkdar jurnalist Elçin Mirzəbəyli deyib.
E.Mirzəbəyli bildirib ki, ayrı-ayrı ölkələri təmsil edən resurslar məlumatları öz dillərində, öz auditoriyalarına, sosial qruplara uyğun şəkildə çatdırırlar:
“Bu sadəcə ümumi informatik məlumat deyil. Adətən statistik rəqəmlər heç nə demir, emosional təsir vasitələri olmur, amma bir dağıntı, yaxud da dağılmış, təhqir olunmuş bir məzarın görüntüsü üzərindən emosional fikirin çatdırılması daha effektiv nəticə yaradır. Bu səfərlərin məqsədi Azərbaycan mediası ilə əməkdaşlığın inkişaf etdirilməsindən ibarət deyil. Bu tamamilə fərqli bir platformadır”.
E.Mirzəbəyli vurğulayıb ki, əgər Azərbaycan mediası öz əlaqələrinin beynəlxalq müstəvidə inkişaf etdirmək istəyirsə, bununla bağlı müstəqil şəkildə addımlar ata bilər:
“Bunun Azərbaycanda kifayət qədər nümunələri var. Azərbaycan mediasında bu istiqamətdə beynəlxalq əməkdaşlıq imkanlarının genişləndirən resurslar var. Əlavə olaraq Azərbaycanda kifayət qədər jurnalist təşkilatları var ki, onlar da beynəlxalq müstəvidə ortaq əməkdaşlıq platformalarının yaradılması ilə bağlı müvafiq addımlar ata bilərlər. Azərbaycana gələn səyyahların missiyası, yaxud blogerləri, jurnalistləri Azərbaycana gətirən, dəvət edən təşkilatçıların missiyası onlarla Azərbaycan mediasının əməkdaşlığını təmin etməkdən ibarət deyil. Bunlar fərqli platformalardır. Əgər media resurslarımız beynəlxalq əlaqələr qurmaq istəyirsə, bunun üçün vasitəçiyə ehtiyac yoxdur. Müstəqil şəkildə öz əlaqələrini qura bilərlər”.
Jalə
Diaspora.TV
