Türkiyədə yaşayan azərbaycanlı iş adamı Mübariz Mənsimovun bir az əvvəl sosial şəbəkə hesabında yazdığı status və paylaşdığı fotolar platforma iştirakçılarının marağına səbəb olub.
Diaspora.TV xəbər verir ki, azərbaycanlı iş adamının paylaşımı mərhum atasının Bakıda məzarını ziyarət edən dostu, türk müğənnisi Mahsum Kırmızıgüllə bağlı olub:
"Atamın məzarını indiyədək ziyarət edə bilməsəm də, dostum Mahsum bunu mənim əvəzimə etdi. Çox sağ ol, əziz dost. Allah rəhmətə gedən bütün ataların ruhlarını şad, yaşayan bütün valideynlərin isə canlarını sağ və salamat eləsin".
Qeyd edək ki, iki gün əvvəl Bakıda konsert proqramı ilə çıxış edən türk müğənnisi Mahsum Kırmızıgül Mübariz Mənsimovun atasının məzarını ziyarət edib.
Xatırladaq ki, M.Mənsimovun atası Qurban Mənsimov 2023-cü ilin iyunun 20-də Türkiyədə müalicə aldığı "Liv Hospital"da vəfat edib. M.Mənsimov atasının dəfnində iştirak edə bilməyib. Səbəb isə 2021-ci ildə məhkəmənin şərti cəza müddətində azərbaycanlı iş adamının Türkiyəni tərk etməməyi ilə bağlı qərarının hələ də qüvvədə olmasıdır.
Belə ki, FETÖ terror təşkilatına üzv olmaqda ittiham edilən M.Mənsimovun 2021-ci ilin martında məhkəməsi keçirilmiş, o, 5 il müddətinə şərti cəza alaraq məhkəmə nəzarəti altında şərti azadlığa buraxılmışdı. İş adamı həmin ilin iyunun 29-da İstanbuldan çıxmama şərtiylə ev həbsindən azad olunub.
X.Zöhrab
Diaspora.TV
