Arxangelskdəki Azərbaycan diasporunun rəhbəri Tərlan Qasımov uzun illər hakimiyyətlə əməkdaşlıq edib və xeyriyyə işlərində köməklik göstərib. Bu ilin yazında isə o, ölkənin milli təhlükəsizliyinə təhdid səbəbindən Rusiya vətəndaşlığından məhrum edilib. Hüquq-mühafizə orqanlarından heç kim onun dəqiq nə etdiyini hələ izah etməyib. Diaspor sədri vətəndaşlığa xitam verilməsi ilə bağlı bildirişi may ayında alıb. Bu barədə qərarı regional Daxili İşlər Nazirliyi verib.
Diaspora.TV xəbər verir ki, bu barədə Rusiya mediası məlumat yayıb.
"Həmkarlarımız Tərlan və onun vəkili ilə söhbət edib, həmçinin rəsmi sənədlərə müraciət edərək orada heç olmasa müəyyən məqamlar tapmağa çalışıblar", - deyə rus mediası yazır.
Qeyd edək ki, Tərlan Qasımov 2000-ci illərin əvvəllərindən Arxangelskdə yaşayır. Burada onun ailəsi və şəxsi biznesi var. 2016-cı ildə o, Arxangelsk vilayətinin Azərbaycan diasporuna rəhbərlik etməyə başlayıb.
2020-ci ildə qubernator Aleksandr Tsıbulski Tərlan Qasımovu “Arxangelsk vilayətinin xeyirxahı” adı ilə təltif edib. 2023-cü ilin dekabrında isə o, bölgənin əsas ictimai mükafatı - "Şimal Mülkiyyəti" ilə təltif edilib.
T.Qasımov Daxili İşlər Nazirliyinin qərarından apellyasiya şikayəti vermək üçün dərhal hüquqi yardıma müraciət edib. İddia ərizəsində azərbaycanlı diaspor rəhbəri iddia edib ki, ölkənin milli təhlükəsizliyini təhdid edən heç bir iş görməyib və vətəndaşlığı olmayan şəxsə çevrildiyi üçün hüquqları pozulub.
"Ailə üzvlərimin hamısı Rusiya Federasiyası vətəndaşlarıdır. Qardaşlar, bacılar, ətrafımdakı hər kəs. Anam isə Azərbaycan vətəndaşıdır. Rusiya bizim vətənimizdir. Bizə burada məscid tikməyə icazə verdilər. Biz bütün millətlərarası məsələlərə əməl edirik, burada dinc, mehriban yaşayırıq, pul qazanırıq. Azərbaycanlılar 20-30 ildir burada yaşayırlar. Fəaliyyətimiz isə mədəni və xeyriyyə xarakterlidir - biz ilk gündən onlara cəlb olunmuşuq. Kim bizə gəlirsə, həmişə kömək edirik, yaxşı işlər görürük", - deyə T.Qasımov əlavə edib.
T.Qasımovun Rusiya vətəndaşlığından məhrum edilməsini bəzi sosial şəbəkə istifadəçiləri “Azərbaycan diasporu daxilində çəkkişmə və yerli hakimiyyətlərə təsir mübarizəsi” kimi də xarakterizə edirlər.
Tərlan Qasımov özü isə iddia edir ki, diaspor üzvləri onu hələ də lider kimi qəbul edir və ona qarşı mehribandırlar. O, vətəndaşlıqla bağlı məsələni kiminsə “sifarişi” hesab edir:
"Mən dəfələrlə demişəm ki, aktiv fəaliyyətim mənə mane olur. Bax, bu, təmiz sifarişdir, Rusiya-Azərbaycan dostluğunun sabotajıdır. Konkret deyə bilmərəm ki, bu diaspor və ya hansısa şəxsə mənə mane olur. Sadəcə olaraq belə bir məntiq var: aktiv insanların problemləri olur Buradakı azərbaycanlılar artıq statuslarından narahat olmağa başlayıblar. Deyirlər ki, bugünkü hökumət, bugünkü qanunlar sizə bunu edirsə, biz sadə vətəndaşların vəziyyəti necə olacaq?".
