ABŞ Dövlət Departamenti Avropaya səyahət etməyi planlaşdıran amerikalı turistlər üçün xəbərdarlığını yeniləyib.
Diaspora.TV ABŞ mediasına istinadən xəbər verir ki, səlahiyyətlilərin səyahətdən çəkindirdiyi ölkə Danimarkadır. Danimarkanın yaşayış üçün ən yaxşı yerlərdən biri kimi ənənəvi reputasiyasına baxmayaraq, turistik saytlara hücumların çoxalması narahatlıqları artırıb.
Sentyabrın 17-də yenilənmiş xəbərdarlıqda insanların çox olduğu yerlərdə qəfil terror aktları təhlükəsi vurğulanır. Xüsusilə, Kopenhagen Bələdiyyə Meydanı və Nyhavn limanı kimi məşhur turistik yerlər potensial hədəflər kimi qeyd edilir. Sənəddə bildirilir ki, terrorçular xəbərdarlıq etmədən nəqliyyat qovşaqlarını, ticarət mərkəzlərini, otelləri və insanların sıx toplaşdığı yerləri hədəfə alaraq hücum edə bilərlər.
Dövlət Departamenti turistlərə ciddi şəkildə tövsiyə edir:
- diqqətli olun, xüsusilə insanların çox olduğu yerlərdə və turizm zonalarında;
- fövqəladə hallar zamanı yerli hakimiyyət orqanlarının göstərişlərinə əməl edin.
Danimarka hökumətinin məlumatına görə, 2023-cü ildə ölkəyə 63 milyondan çox turist gəlib ki, bunların da 600 mini ABŞ-dandır.
Artan təhlükəyə baxmayaraq, Danimarka ehtiyatlı olmağa çağıraraq 2-ci həyacan səviyyəsində qalır. Bu səviyyə Fransa və Meksika kimi ölkələrdə tətbiq olunur. Kanada və Yaponiya isə adi ehtiyat tədbirlərini ehtiva edən birinci səviyyədə qalır.
Maraqlıdır ki, Danimarka üçün təhlükə səviyyəsi Paris və London kimi böyük şəhərləri olan bir çox digər Avropa ölkələri ilə eynidir. Belə meqapolislər, bir qayda olaraq, daim terror hücumları təhlükəsi ilə üzləşirlər ki, bu da xəbərdarlığın daha yüksək səviyyəsinə gətirib çıxarır. Lakin ABŞ bu ölkələrə münasibətdə eyni mövqe nümayiş etdirmir.
